Straika wa Yanga mganda Hamis Kiiza ambaye amekuwa gomzo kwa mabeki wa Simba.Picha na Maktaba
BEKI wa Simba, Joseph Owino amekiri ameifuatilia Yanga na
kugundua kwamba mastraika wake wana kasi ambayo inahitaji nguvu na akili
kukabiliana nao lakini amesisitiza kuwa wamekaa chini na Gilbert Kaze
na kupata dawa yao.
Yanga na Simba zinacheza Oktoba 20 kwenye Uwanja
wa Taifa lakini Owino amekuwa akifuatilia timu zote kabla ya kucheza
nazo na sasa ameshamaliza kuwachunguza Mrisho Ngassa, Didier Kavumbagu
na Hamis Kiiza wa Yanga na anajua jinsi ya kuwatuliza .
“Kwa kweli Yanga inaonekana ipo vizuri, tena siku
hadi siku wanaimarika, hivyo inatulazimu na sisi kujipanga zaidi ili
kuwasimamisha wachezaji wao wajanja wajanja.
“Ngassa ninayemjua tangu wakati huo ni hatari na
mjanja sana, tena ana kasi kubwa, lakini cha kushangaza nimemwona kwa
kipindi kirefu akiwa na uwezo ule ule,”alisema Owino.
“Tutakuwa makini sana siku tukicheza na Yanga
kwani ukitazama michezo ya Yanga mingi, wamekuwa wakitafuta mabao ya
mapema ambayo kwa kiasi kikubwa yamewapa ari, nilishacheza ligi ya
Tanzania muda mrefu, ninawajua wachezaji wengi, nafikiri nitakaa na
wenzangu wa nafasi ya ulinzi hasa mgeni kama Gilbert Kaze kupanga jinsi
tutakavyowapa wakati mgumu Ngassa na Kiiza,”alisisitiza mchezaji huyo
msomi kuliko wote kwenye kikosi cha kwanza cha Simba.
